Alcalde de Vilanova entrega diplomas ao alumnado que remata curso de limpeza impartido por COGAMI
  • Novas
  • 04 de octubre de 2018

Alcalde de Vilanova entrega diplomas ao alumnado que remata curso de limpeza impartido por COGAMI

Un total de quince persoas con discapacidade recolleron esta mañá o seu diploma que acredita que remataron e superaron o curso de Limpeza de superficies e mobiliario en edificios e locais que impartimos no concello de Vilanova.

Precisamente foi o alcalde desta localidade, Gonzalo Durán, acompañado do tenente de alcalde, Javier Tourís, e mailo vicepresidente de COGAMI, Ramón Sestayo, as persoas encargadas de facer entrega destes diplomas.  

O curso, que xa conta con 5 insercións laborais, é unha iniciativa que comprende o programa Máis Emprego e que financia o Fondo Social Europeo e Fundación Bancaria “la Caixa”, que ten por finalidade a mellora da inserción sociolaboral das persoas con discapacidade ou incapacidade laboral en situación ou risco de exclusión, mediante a activación para a busca de emprego e o trazado de itinerarios personalizados de cara á inserción.

O ámbito territorial deste programa engloba toda a provincia de Pontevedra, se ben nesta ocasión a formación impartiuse con ámbito de actuación na comarca do Salnés, sendo o alumnado dos concellos de Vilanova, Vilagarcía, a Illa e Meis.

En palabras do vicepresidente de COGAMI, Ramón Sestayo “queremos resaltar do compromiso de COGAMI co rural, sempre tentamos levar a formación ás zonas rurais para evitar desprazamentos ás cidades que, como saben, contan con máis recursos”. Sestayo tamén expresou o seu agradecemento ao concello de Vilanova “polo apoio que nos brinda ás persoas con discapacidade” e adiantou que proximamente iniciará outro curso en Vilanova de manipulador de alimentos.

O Alcalde de Vilanova dixo que “o concello pon as instalacións ao servizo de todos os colectivos, entre eles os da discapacidade” e anunciou tamén que “ata o 2023 estas instalacións poden ser utilizadas por COGAMI”, data que coincide co fin do programa Máis Emprego, que iniciou en 2017 e rematará seis anos despois.

15 persoas formadas.

   

Non puideron estar todas as alumnas e alumnos presentes para recoller o diploma, pero si estiveron a maioría. Compartiron aula durante un mes e a complicidade e os lazos de amizade que crearon sentíronse segundo ían chegando á aula e se ían saudando. “Temos un grupo de Whatsapp no que nos comunicamos constantemente, sobre todo cando estábamos nas prácticas para comentar o que facía cada un”, apuntaba Mónica Vidal. Xa remataron as prácticas e o curso, pero “seguimos aínda en contacto e ata fixemos unha comida de fin de curso”.

  

Lucía Goríns é unha das cinco persoas que está traballando tralo seu paso polo curso. Non lle deu nin tempo de cambiarse para recoller o diploma. Dende hai un mes, tras unha oferta de emprego que lle chegou ao Servizo de Intermediación Laboral (SIL), asistiu a unha entrevista de traballo de Autocares Rías Baixas e seleccionárona. “Sempre tiven trabas  e problemas para encontrar traballo ata que cheguei a esta empresa que me entrevistou, orientoume e formoume. Dou mil gracias”, explicaba Lucía por esta oportunidade de demostrar todo o potencial que ten.

  

Para José Luis Veiga tampouco foi un camiño de rosas. Tras traballar máis de trinta anos na construción, unha enfermidade derivou nunha incapacidade para desempeñar a única profesión que coñecía, co que tivo que reciclarse e volver poñerse en activo na busca de emprego. Apuntado no SIL, como as dúas compañeiras “cada vez que me chaman para unha oferta de traballo que sae para min é unha ilusión para non estar na casa”, nos contaba José Luis, quen tamén está traballando.