- Novas COGAMI Social
- 29 de septiembre de 2026
A entidade AGL organizou a segunda ruta fluvial Dragon Boat en Pontecesures
Máis de sesenta mulleres participaron na II Ruta Fluvial Dragon Boat organizada pola entidade AGL e o Club Náutico de Pontecesures polo río Ulla. Chegadas de diferentes puntos de toda Galicia, esta competición significa máis que deporte, converténdose nunha xornada de saúde, solidariedade e convivencia.
Co lema “Padexamos xuntas pola vida, pola superación e pola esperanza”, este evento está especialmente dirixido a persoas con linfedema, mulleres superviventes de cancro de mama e outras mulleres que desexen participar nesta experiencia de deporte e apoio mutuo.
Foron catro dragon boats os que partiron ás 10:30 horas dende o peirao de Pontecesures escoltados por palistas do Club Náutico de Pontecesures para recorrer varios quilómetros do río.
O Dragon Boat é unha modalidade deportiva que, ademais de fomentar o exercicio físico e o traballo en equipo, se emprega en programas de recuperación e actividade física para mulleres operadas de cancro de mama. A súa práctica pode contribuír á recuperación da forza, á capacidade funcional e ao benestar emocional, sempre adaptándose ás necesidades de cada participante e ás indicacións dos profesionais sanitarios.
Colaboración institucional
A II Edición da Ruta Fluvial Dragon Boat polo río Ulla conta coa colaboración da Xunta de Galicia, a través de Deporte Galego, do Club Náutico Pontecesures e do Concello de Pontecesures.
