Novas

• Novas COGAMI Social
• 09 de noviembre de 2023

COGAMI inicia curso en Ferrol no que se forman quince persoas con discapacidade como administrativas

As instalacións que ten a COGAMI en Ferrol, (rúa Sánchez Calviño, nº 56-58) acollen un curso de formación no que un total de quince persoas co certificado de discapacidade ou incapacidade laboral para profesión habitual, estanse a formar sobre Actividades administrativas na relación co cliente.

Esta formación, cunha duración de 818 horas lectivas, consta de contidos teóricos que se imparten de xeito presencial en horario de 9 a 14 horas, e tamén de prácticas profesionais en empresas da contorna, cunha duración de 120 horas, onde o alumnado terá a oportunidade de aportar os coñecementos adquiridos desenvolvéndose nun posto de traballo.

Este curso de Actividades administrativas na relación co cliente corresponde ao Plan formativo para o emprego da Comunidade Autónoma de Galicia para o período 2023-2024, financiado pola Consellería de Promoción do Emprego e Igualdade da Xunta de Galicia e polo Ministerio de Educación e Formación Profesional.

Dirixido a persoas desempregadas, esta formación iniciárona 15 persoas, 10 mulleres e 5 homes, procedentes dos concellos de Ferrol, Narón, Fene, Ares, Mugardos e Vilarmaior, e teñen idades comprendidas entre os 28 e os 58 anos.

Este alumnado terá que formarse en materias como técnicas de recepción e comunicación, operacións administrativas comerciais, a atención ao cliente, xestión administrativa e aplicacións informáticas, ademais de gravación de datos a súa posterior xestión. Outras materias que se contemplan son a lingua inglesa para a xestión e administración na relación co cliente e, antes do inicio das clases prácticas, impartirase un módulo de ofimática sobre sistemas operativos, busca de información e aplicacións informáticas empregadas nas administracións.

Tralo remate das prácticas, o alumnado terá que realizar uns módulos sobre a inserción laboral, sensibilización medioambiental, ademais de en igualdade de xénero e formación para a igualdade. Ao finalizar, recibirán un diploma acreditativo.