Novas

• Novas COGAMI Social
• 16 de septiembre de 2026

COGAMI reivindica máis seguridade, coordinación e inclusión na atención sanitaria ás persoas con discapacidade orgánica

O 17 de setembro conmemórase o Día Mundial da Seguridade do Paciente, unha efeméride que dende COGAMI e a súa Comisión Sociosanitaria aproveitan para sensibilizar, visibilizar e reivindicar dereitos das persoas con discapacidade orgánica.

As sesenta asociacións que integran o movemento asociativo de COGAMI reivindican máis coordinación sociosanitaria, máis investigación inclusiva tendo en conta ás mulleres, máis seguridade nos tratamentos para persoas con discapacidade e unha atención máis humana e accesible.

Baixo o lema “Saúde: ciencia e conciencia”, COGAMI e a súa Comisión Sociosanitaria lanzan unha campaña a través das redes sociais para visibilizar as necesidades e demandas das persoas con enfermidades crónicas, discapacidade e outras condicións de saúde. Ademais, a través desta campaña, a entidade traslada unha serie de reivindicacións concretas dirixidas á Administración pública, á industria farmacéutica e ás persoas investigadoras.

Á Administración pública

• Maior coordinación entre profesionais e especialidades sanitarias, de xeito que sexa a información a que se traslade dun departamento sanitario a outro, e non a/o paciente.
• Unha atención sanitaria máis humana, accesible e centrada nas persoas.
• Seguridade nos procesos e tratamentos sanitarios para as persoas con discapacidade, adaptando protocolos, probas e coidados ás súas circunstancias específicas para evitar posibles erros e riscos.

Á industria farmacéutica

• Acceso a tratamentos eficaces para as enfermidades crónicas.
• Compromiso coa seguridade dos procesos e tratamentos dirixidos a persoas con discapacidade, garantindo que o seu deseño e desenvolvemento teña en conta as súas necesidades específicas.

Ás persoas investigadoras

• Máis investigación en enfermidades raras e de baixa prevalencia, para garantir un mellor futuro ás persoas que as teñen.
• Investigación que inclúa á muller de xeito real e representativo nos estudos e ensaios clínicos, evitando o nesgo de xénero que historicamente afectou ao coñecemento científico e ao deseño de tratamentos.

Porque a saúde é un dereito, non unha carreira de obstáculos. Cada paciente conta e cada voz, importa.

Entidades de COGAMI da Comisión Sociosanitaria

Todas