- Novas COGAMI Social
- 27 de mayo de 2024
Encontro en Panxón de persoas con enfermidade renal de toda Galicia
Familias con menores con enfermidade renal crónica chegadas de toda Galicia reuníronse na Residencia de Tempo Libre de Panxón, no Concello de Nigrán, para realizar unha xornada de convivencia e crear vínculos ademais de compartir experiencias.
Organizada pola Federación Alcer Galicia, durante este encontro as e os menores contaron con espazos de lecer educativo nos que puideron achegarse á realidade da nutrición nas diferentes etapas da enfermidade renal. Para a xente maior, creáronse espazos de formación, información e posta en común de experiencias que foi inaugurado por Jacobo Rey, director xeral de Familia, Infancia e Dinamización Xeográfica, con quen se ten o convenio do Programa Medro de atención a menores e familias con enfermidade renal crónica.
A doutora Marta Gil, pediatra do CHUS, achegou a importancia da intervención multidisciplinar nas consultas de pediatría nefrolóxica. Outros temas que se trataron nesta xornada estiveron relacionados coa nutrición, a sobrecarga familiar e a súa xestión en parella, ademais de falar sobre o novo baremo para obter o certificado de discapacidade.
A xornada de lecer rematou coa actuación do Mago Midas que contribuíu a crear un ambiente distendido e alegre entre todas as persoas asistentes a estas xornadas de experiencias compartidas.