- Novas COGAMI Social
- 06 de agosto de 2025
Máis de 200 persoas da provincia da Coruña participan nun proxecto para mellorar a calidade de vida de pacientes con enfermidade renal crónica
Durante o ano 2024, máis de 200 persoas da provincia da Coruña beneficiáronse do proxecto “Servizo de atención ao impacto sobre o proxecto de vida en persoas con Enfermidade Renal Crónica (ERC) e familiares”, levado a cabo pola asociación Alcer Coruña. A iniciativa desenvolveuse con atención presencial nas áreas sanitarias de Ferrol (participaron 142 persoas), na área de Santiago e Barbanza (participaron 5 persoas) e na área da Coruña e Cee (participaron 26 persoas). O obxectivo principal do programa é mellorar a calidade de vida das persoas con enfermidade renal crónica e das súas familias mediante a intervención social individualizada, o fomento da autonomía persoal e a promoción da súa participación social.
O diagnóstico dunha ERC implica importantes cambios na vida das persoas, afectando á súa vida laboral e social, aos hábitos de alimentación e incluso á situación económica. Estes factores condicionan directamente a percepción do benestar e da saúde.
A través deste programa, ofrecéronse recursos para favorecer o desenvolvemento das capacidades físicas, manter a funcionalidade e reducir procesos dexenerativos; proporcionouse información, orientación e asesoramento sobre os recursos sociais dispoñibles; traballouse na adquisición e mellora de habilidades sociais, formativas e prelaborais, así como na promoción do lecer inclusivo e a práctica deportiva no contorno máis próximo.
O proxecto forma parte do Plan de Prioridades, financiado pola Fundación ONCE e COCEMFE encargouse da xestión da subvención, do asesoramento ás entidades beneficiarias e do seguimento continuo de cada iniciativa.
