- Novas COGAMI Social
- 24 de junio de 2024
Mes do lipedema: AGL visibiliza esta enfermidade invisible que afecta maioritariamente ás mulleres
O mes de xuño é a data dedicada ao lipedema, enfermidade recoñecida pola OMS dende o 8 de maio do 2018 e incluída no catálogo ICD-11 (CIE-11) que clasifica internacionalmente ás enfermidades baixo o código EF02.2 `Alteracións non inflamatorias da graxa subcutánea´.
Esta patoloxía afecta a preto dun 20% da poboación feminina mundial, tendo unha repercusión de menor medida a homes. Estímase que a nivel mundial, 616.000.000 de persoas viven con esta enfermidade completamente descoñecida, non rara, pero si infradiagnosticada e infratratada pola Sanidade Pública.
Que é o Lipedema?
É unha enfermidade crónica e dexenerativa, de orixe xenética e con compoñente hormonal. Adoita confundirse co linfedema, celulite ou obesidade porque os seus principais síntomas son a desproporción en brazos e pernas en comparación co resto do corpo. Actualmente, o lipedema carece de cura.
As persoas que teñen lipedema conviven con dores constantes e incapacitantes, teñen pesadez, hematomas frecuentes e problemas circulatorios, estreitamento de capilares e dano linfático. En casos avanzados, afecta gravemente á mobilidade impedindo que a persoa poida camiñar e valerse por si mesma. Ademais, non responde a dietas convencionais nin exercicio intenso.
Ao ser unha patoloxía invisible para o sistema de saúde, é moi difícil contar cun diagnóstico médico e, ao carecer dun tratamento conservador, pode empeorar dando lugar a problemas non só físicos senón tamén psicolóxicos así como trastornos da conduta alimentaria.
Ademais das propias dificultades que teñen as persoas diagnosticadas con lipedema, a maioría recoñece que atopa barreiras a nivel social, como poder atopar roupa adecuada e o feito de socializar con outras persoas. Isto significa vivir cunha carga emocional, de incomprensión e rexeitamento social por ter unha imaxe que non se corresponde cos estereotipos da sociedade actual. Unha persoa con lipedema escoita con demasiada frecuencia comentarios como: “Que pernas tes...co guapa que es de fronte”, “Por que non fas dieta se só che sobran uns quilos?”, “Iso cun pouco de dieta e exercicio quítalo”.
Actos programados
Co fin de que o lipedema sexa unha patoloxía incluída na sanidade pública e as prendas de compresión sexan incluídas no Catálogo Ortoprotésico nacional, dende AGL iniciaron unha
Campaña na plataforma Change.org que leva por título ¡Reconocimiento del lipedema como enfermedad en la sanidad pública YA! e se pode ver neste enderezo: https://www.change.org/p/reconocimiento-del-lipedema-como-enfermedad-en-la-sanidad-p%C3%BAblica-ya
En colaboración co Concello de Vilagarcía e a asociación de comerciantes Zona Aberta, dende AGL levan a cabo unha campaña de sensibilización que se desenvolverá en catro accións:
O 21 de xuño: ás 13 horas presentación dunha exposición na Praza de Galicia de Vilagarcía que estará aberta ata o 30 de xuño.
Os escaparates de comercios Nieves Álvarez, Moto Bazar, calzados e complementos Yosu, Los Pepes, Iratis moda, María Costureiro, Cocoe Moda e + Sport, todos integrantes da asociación de comerciantes Zona Aberta, exporán maniquís co tratamento de lipedema.
O 29 de xuño de 11.00h a13.30h. Colocación dunha mesa informativa na Praza de Galicia de Vilagarcía para sensibilizar, orientar e informar sobre o lipedema.
O 29 de xuño, os locais de hostalería de Zona Aberta recadarán fondos para AGL a través de diferentes huchas colocadas nos seus locais.
En Lugo, o 24 de xuño, ás 19.30h., no Centro Cívico Uxío Novoneyra, desenvolverase unha charla-coloquio sobre a Abordaxe multidisciplinar do Lipedema “QUE NADA NOS PARE”.