Novas

• Novas COGAMI Social
• 07 de noviembre de 2023

O 70% das persoas que forman parte da rede de voluntariado de COGAMI ten discapacidade

 Podes descargar a nota

En 2001 inicia a Rede de Voluntariado de COGAMI para potenciar as capacidades das persoas con discapacidade e, a través da participación activa, fomentar a súa autonomía e independencia. Actualmente, esta bolsa de voluntariado está conformada por máis de 1.200 persoas inscritas, superando as cincuenta novas incorporacións este ano. De todas estas persoas inscritas, o 70% ten discapacidade, o que evidencia que as persoas con discapacidade non só son receptoras de accións voluntarias, senón que fan voluntariado, participan e colaboran ofrecendo o seu tempo, coñecementos, experiencia, capacidades e habilidades a outras persoas que poden formar parte do mesmo colectivo ou non.

“Son moitos os beneficios que proporciona o voluntariado”, explica a coordinadora da área de Promoción da Autonomía Persoal de COGAMI, Juani Tubío, quen engade que “ademais de permitir adquirir habilidades sociais e de axuda a outras persoas, o voluntariado contribúe á promoción da autonomía persoal e ao fomento e participación activa en igualdade de oportunidades das persoas con discapacidade dentro da sociedade”.

Para mellorar esta rede de voluntariado, dende COGAMI desenvólvense programas cofinanciados pola Xunta de Galicia a través da Consellería de Política Social, pola  Dirección Xeral de Xuventude, Participación e Voluntariado e tamén polos fondos 0,7% do IRPF procedentes de todas as persoas que marcaron na declaración da renda o recadro 106 de Actividades de interese xeral consideradas de interese social, coñecida como o recadro da X Solidaria.

A través destes fondos fináncianse os catro tipos de programas de voluntariado cos que conta a Confederación: o de acompañamento e apoio a persoas con discapacidade; o de apoio educativo a estudantes que precisan reforzo nalgunha materia; o de apoio en charlas de sensibilización sobre a discapacidade, o programa acompañamento en actividades de lecer ou terapéuticas como a natación, ademais do programa de acompañamento e apoio ACOMPAÑA-M, dirixido as persoas maiores do centro residencial e de día de Arteixo.  Outro programa que se destaca é Sumando na rede, que ten por finalidade sensibilizar e permitir a participación das persoas con discapacidade como voluntarias, promovendo a súa participación activa asegurándolle os apoios necesarios para que poidan levar a cabo esta participación.

“Contar cunha ampla rede de voluntariado para a nosa Organización supón un valor social incalculable, tanto  para as persoas voluntarias como para as que se benefician da acción voluntaria”, explica Juani Tubío. Engade que outra das particularidades que ten a rede de voluntariado de COGAMI é que “contamos cun sistema de certificación de competencias do voluntariado, un valor engadido para a rede que temos de persoas voluntarias”.

Anualmente, COGAMI ofrece charlas de sensibilización e concienciación da discapacidade, ademais de prevención de lesións medulares, como as 48 ofrecidas neste ano ás que asistiron 1.061 persoas. Dirixidas ao conxunto da poboación, especialmente a escolares, estas charlas adoitan contar coa participación de persoas voluntarias que relatan as súas propias vivencias. Todas as persoas que fan voluntariado en COGAMI contactaron previamente remitindo unha solicitude de adhesión a través da páxina web www.cogami.gal  ou por contacto telefónico 981 574 698. Tras unha entrevista inicial, as persoas interesadas en facer voluntariado en COGAMI reciben unha formación previa á súa incorporación á rede de voluntariado.

CAMPAÑA #SOMOSCOGAMI

Durante todo este ano 2023, en COGAMI visibilizamos unha campaña de sensibilización sobre as necesidades que presentan as persoas con discapacidade e familias. É unha chamada á acción para amosar a realidade que viven milleiros de persoas actualmente, o conxunto do 9% da poboación.

Neste mes de novembro reivindicamos a figura da persoa voluntaria, poñendo o foco en que a persoa con discapacidade non só resulta beneficiaria deste voluntariado senón que exerce de persoa voluntaria, como indica o 70% das persoas inscritas na nosa bolsa de voluntariado.

Podes ver o vídeo que realizamos para esta campaña de voluntariado neste enlace  https://youtu.be/jqV7R9AFLuA

No mes de decembro, remataremos a campaña co lema SOMOS REIVINDICACIÓN: Contribuímos á participación social en igualdade.

Podes descargar as fotos de abaixo.

Pés de foto: 

A voluntaria Sandra apoia na actividade de horta no centro de COGAMI de Lugo a Mar e Julio

A voluntaria Zaida presta apoio educativo a Wiame para reforzar coñecementos na materia de lectura e escritura en lingua castelá.

O voluntario Pablo apoia ao usuario José Luis durante a saída á biblioteca

Voluntaria de COGAMI Kirtsy Turner coa usuaria Paula do centro de Medelo que presta apoio en talleres e acompáñanos en saídas