Novas

• Novas COGAMI Social
• 09 de mayo de 2025

Oito persoas rematan con certificado profesional un curso de tratamento de datos impartido por COGAMI en Ourense

Rosa, José Luis, Catalina yJavier  son catro dos alumnos e alumnas que se formaron en Ourense no curso de Operacións de Gravación e Tratamento de Datos e Documentos, impartido por COGAMI nas súas instalacións da rúa Farixa. O curso finalizou coa obtención do certificado de profesionalidade por parte de oito participantes (cinco homes e tres mulleres).

Esta formación, que se desenvolveu entre decembro de 2024 e a primavera de 2025, formou parte da programación 2024-2025 das Accións Formativas para Desempregados (AFD), cofinanciadas pola Consellería de Emprego, Comercio e Emigración e polo Ministerio de Educación, Formación Profesional e Deportes.

O curso contou cun total de 458 horas lectivas, que incluíron os módulos de gravación de datos, tratamento de datos, textos e documentación, reprodución e arquivo, así como contidos transversais de inserción laboral, igualdade de xénero e sensibilización. A parte teórica completouse cun período de prácticas en empresas da provincia, fundamentais para a posta en práctica dos coñecementos adquiridos.

Desde as áreas de Emprego e Formación de COGAMI agradecen a colaboración de Asociación Aixiña, Viaqua SLU, Carrocerías Digal SAL, Academia Manzaneda SL, Centro de Estudios Profesionales de Galicia (Adams Ourense), Hospitales Cosaga SL, Valadrín SL (Academia Galespace Xinzo) e Fademga Plena Inclusión Galicia por acoller ao alumnado en prácticas e contribuír á súa formación profesional.

No mes de decembro iniciaban esta acción formativa 15 persoas (8 homes e 7 mulleres), procedentes de concellos como Ourense, Barbadás, Pereiro de Aguiar, O Carballiño e Xinzo de Limia. Todas elas tiñan recoñecida unha discapacidade ou unha incapacidade laboral para a súa profesión habitual e estaban en situación de desemprego, ademais de estar inscritas no Servizo de Emprego de COGAMI.

Con esta formación, o alumnado adquiriu competencias que lle permitirán mellorar a súa empregabilidade e avanzar cara a unha participación plena e efectiva no mercado laboral.