- Novas
- 04 de octubre de 2023
A asociación Algaria aprendeeu a navegar a vela en Sanxenxo
A Asociación de Persoas con Discapacidade da Comarca da Limia (Algaria) participa no programa Lecer Náutico de respiro familiar que desenvolve COGAMI e que fai posible que as persoas con discapacidade aprendan a navegar a vela.
Este programa, que financia o RC Náutico de Sanxenxo, posibilita a convivencia nunha residencia adaptada de Sanxenxo. As mañás dedícanas a aprender a navegar a vela lixeira asistindo ás clases que teñen unha duración de 20 horas. As tardes aprovéitanas para realizar actividades de lecer como ir á praia, pasear, visitar museos, saír tomar algún refrixerio, bailar,... diversas actividades que escollerán segundo as preferencias das persoas.
Xunto ás persoas que chegaron de Algaria, na edición do programa de Lecer Náutico deste ano participan un total de 98 persoas procedentes de entidades de tres centros de día e ocupacionais e de nove entidades que forman parte de COGAMI. Ademais da comarca da Limia, chegan doutras como A Coruña, Bergantiños, Arzúa e Terra de Melide, Santiago, Pontevedra e Muros.
O programa Lecer Náutico iniciou en 2013 e conta con grande aceptación, permitindo achegar o deporte de vela a persoas con discapacidade, como tamén, supón unha estadía de cinco días de vacacións na vila de Sanxenxo, onde poderán ter acceso a actividades inclusivas, nas que poden participar todas as persoas. Ademais, supón ter uns días de respiro familiar, tanto para as propias persoas con discapacidade como para as súas familias.