- Novas COGAMI Empresarial
- 13 de enero de 2026
Accede Social, de COGAMI Empresarial, impulsa a sostibilidade do transporte co apoio do programa de transformación de frota
Accede Social, a empresa de transporte accesible vinculada ao grupo COGAMI Empresarial, foi confirmada como beneficiaria do Programa de Axudas á transformación de frota de viaxeiros e mercadorías, unha iniciativa de ámbito estatal que ten como obxectivo modernizar e facer máis sostible o parque móbil do transporte por estrada en España.
Este recoñecemento forma parte do compromiso de Accede Social coa innovación e a transición ecolóxica no sector do transporte, ao tempo que reforza a súa misión social centrada na inclusión laboral das persoas con discapacidade.
En que consiste este programa de axudas?
O Programa de Axudas á transformación de frota de viaxeiros e mercadorías é unha liña de subvencións impulsada no marco do Plan de Recuperación, Transformación e Resiliencia, con financiamento da Unión Europea a través do instrumento NextGenerationEU. O seu obxectivo é fomentar a renovación e modernización das frotas de transporte por estrada, incentivando actuacións que reduzan as emisións contaminantes, melloren a eficiencia enerxética e aposten por tecnoloxías máis sostibles.
Entre as actuacións subvencionables inclúense:
- O achatarramento de vehículos antigos.
- A adquisición de vehículos con enerxías alternativas baixas en carbono.
- Adaptacións e modificacións tecnolóxicas para mellorar a eficiencia enerxética.
- A implantación de infraestruturas de recarga eléctrica.
- A adquisición de semirremolques para solucións de transporte intermodal.
Este conxunto de incentivos non só contribúe á mellora ambiental, senón que tamén permite reforzar a competitividade das empresas de transporte, especialmente daquelas que apostan por modelos de negocio innovadores e responsables.
Un novo paso cara a un transporte máis xusto e inclusivo
Para Accede Social, centro especial de emprego no que o 100 % do cadro de persoal está formado por persoas con discapacidade, esta subvención supón unha oportunidade para continuar avanzando no seu dobre propósito: ofrecer servizos de transporte adaptado de alta calidade e consolidar un modelo empresarial que combina sostibilidade, inclusión e excelencia operativa.
Desde os seus inicios, Accede Social foi medrando e ampliando rutas tanto dentro como fóra da propia COGAMI, consolidándose como unha das iniciativas máis relevantes do transporte accesible en Galicia. Grazas a programas como este e á confianza das entidades usuarias, a empresa segue dando pasos firmes cara a un sistema de transporte máis verde e socialmente responsable.
