- Novas COGAMI Empresarial
- 10 de abril de 2026
Coregal leva á radio o seu modelo de economía social e sostible
A xerente de Coregal, Beatriz González, participou recentemente no programa de Radio Voz, onde puxo en valor o percorrido e o impacto deste centro especial de emprego impulsado por COGAMI.
Durante a entrevista, emitida no espazo Ecovoz, explicou as orixes de Coregal, un proxecto que naceu en 1994 a partir dun curso de reciclaxe financiado pola Unión Europea e que soubo medrar ata converterse nun referente na xestión sostible de residuos e na creación de emprego inclusivo.
Beatriz González destacou como, desde os seus inicios, Coregal combinou dous retos clave: a protección ambiental e a inclusión laboral de persoas con discapacidade. Un modelo pioneiro que, co paso dos anos, evolucionou cara a unha xestión integral de residuos, prestando servizos tanto a empresas como a administracións públicas e contribuíndo activamente á economía circular.
A intervención tamén serviu para poñer en valor o papel das empresas de economía social na xeración de impacto positivo, non só a nivel ambiental, senón tamén social, demostrando que é posible construír un tecido empresarial máis sostible e inclusivo.
A presenza en medios como Radio Voz permite achegar este tipo de experiencias á cidadanía, visibilizando proxectos que demostran, con feitos, que outra forma de facer empresa non só é posible, senón necesaria.
Podes escoitar a entrevista completa aquí: https://www.cogami.gal/difusion/multimedia/radio/radio-voz-entrevista-a-xerente-de-coregal/
