- Novas COGAMI Empresarial
- 30 de junio de 2026
Coregal xestionou máis de 34.800 toneladas de residuos en 2025, impulsando a Economía Circular en Galicia
A xestión responsable dos residuos é unha peza fundamental na transición cara a un modelo económico máis sostible. Desde esta visión, Coregal continúa a traballar cada día para reducir o impacto ambiental, favorecer a reutilización e a reciclaxe de materiais e promover unha maior concienciación cidadá sobre a importancia dunha correcta separación dos residuos.
Ao longo de 2025, a empresa xestionou 34.857,62 toneladas de residuos a través da súa rede de catro ecoplantas situadas en Boiro, Carballo, Santiago de Compostela e Mos, ademais de prestar servizo en 12 puntos limpos de titularidade municipal distribuídos por distintos concellos galegos.
A actividade de Coregal abrangue a recollida e xestión de diferentes tipos de residuos, como os biorresiduos, os residuos voluminosos, os envases lixeiros, o papel e cartón, desenvolvendo tamén proxectos de sensibilización ambiental dirixidos á cidadanía e ao tecido comercial.
Entre as iniciativas destacadas do exercicio atópase a campaña desenvolvida en colaboración co Concello de Santiago de Compostela para mellorar a recollida e o tratamento do papel e cartón procedente do comercio local, unha acción orientada a fomentar boas prácticas ambientais e incrementar a participación na separación selectiva dos residuos.
A empresa continúa ademais apostando pola innovación, a mellora continua e as alianzas con administracións públicas, entidades e outras empresas para desenvolver novas solucións que favorezan unha xestión dos residuos máis eficiente e sostible.
Con 229 persoas traballadoras, das que o 87,77 % teñen discapacidade, Coregal demostra que a protección ambiental e a inclusión laboral poden avanzar da man. A través da súa actividade, a empresa contribúe á creación de emprego de calidade ao tempo que ofrece solucións ambientais que xeran un impacto positivo no territorio.
