- Novas COGAMI Empresarial
- 09 de julio de 2026
Economía circular con impacto social: cando a sostibilidade tamén crea oportunidades
A Economía Circular representa un novo xeito de entender a produción e o consumo, no que os recursos se aproveitan durante máis tempo, se reduce a xeración de residuos e se minimiza o impacto sobre a contorna. En COGAMI Empresarial, este modelo vai un paso máis alá, xa que a sostibilidade ambiental convive cun claro compromiso coa inclusión social e laboral das persoas con discapacidade.
Coregal é un dos mellores exemplos desta aposta, desenvolvendo servizos de recollida, tratamento e valorización de residuos que permiten dar unha nova vida a miles de toneladas de materiais cada ano. Durante 2025, a empresa xestionou máis de 34.857 toneladas de residuos, contribuíndo á protección ambiental e á transición cara a unha sociedade máis sostible.
Outro exemplo é Trameve, especializada na xestión de vehículos fóra de uso e na recuperación de pezas para a súa reutilización. A través da súa actividade, favorece un uso máis eficiente dos recursos e contribúe á redución dos residuos asociados ao sector da automoción.
Tamén Integratex forma parte desta cadea de valor sostible, apostando por un modelo de moda responsable que promove a reutilización e a segunda vida dos produtos téxtiles, fomentando un consumo máis consciente e respectuoso co medio ambiente.
A Economía Circular está tamén presente noutras actividades do Grupo, desde o mantemento sostible de espazos verdes desenvolvido por Dixardín ata a aplicación de medidas ambientais e de eficiencia nos diferentes procesos empresariais.
Este modelo demostra que a sostibilidade non só consiste en coidar o planeta, senón tamén en construír unha sociedade máis xusta. A través das súas actividades, COGAMI Empresarial xera emprego de calidade para persoas con discapacidade, demostrando que o impacto ambiental positivo e o impacto social poden avanzar da man.
Así, COGAMI Empresarial continúa consolidando un modelo empresarial no que cada residuo recuperado, cada material reutilizado e cada proceso mellorado se converten tamén nunha oportunidade para crear valor social e avanzar cara a un futuro máis sostible.
