- Novas COGAMI Empresarial
- 10 de agosto de 2026
Hornos de Lamastelle: tradición e innovación ao servizo das persoas
Con máis de tres décadas de traxectoria, Hornos de Lamastelle continúa demostrando que tradición e innovación poden avanzar da man. A empresa de COGAMI Empresarial consolidou durante 2025 un modelo baseado na calidade dos seus produtos, a mellora continua dos seus procesos e o compromiso coas persoas e co medio ambiente.
A elaboración diaria de pan, empanadas, empanadillas, doces e outros produtos de panadaría e pastelaría convive cunha firme aposta pola innovación. Durante o último ano, a empresa continuou desenvolvendo novos produtos e mellorando os seus procesos produtivos para adaptarse ás necesidades do mercado sen renunciar á calidade que caracteriza a súa marca.
O exercicio estivo marcado tamén pola participación en importantes citas do sector, como HIP – Horeca Professional Expo, en Madrid, e o Galicia Fórum Gastronómico, espazos que permitiron dar a coñecer os seus produtos, compartir experiencias e identificar novas oportunidades de desenvolvemento para a empresa.
No ámbito da sostibilidade, Hornos de Lamastelle continuou avanzando na mellora da súa xestión ambiental. Entre as iniciativas impulsadas destaca o proxecto para valorizar arredor de 200 toneladas anuais de biorresiduos, favorecendo a súa transformación en compost e contribuíndo a un modelo de produción máis circular e respectuoso co medio ambiente.
A empresa mantén, ademais, un firme compromiso coa creación de emprego para persoas con discapacidade, demostrando que a excelencia na industria alimentaria é plenamente compatible cun modelo empresarial baseado na inclusión, na igualdade de oportunidades e no impacto social positivo.
Cada produto elaborado en Hornos de Lamastelle representa así moito máis ca un alimento: é o resultado dun proxecto que combina tradición, innovación, sostibilidade e compromiso social para seguir construíndo un futuro con máis oportunidades para todas as persoas.
