- Novas COGAMI Empresarial
- 09 de junio de 2026
Trameve recibe un accésit nos Premios SIGRAUTO á Innovación pola reutilización de pneumáticos como mobiliario corporativo
Trameve foi recoñecida cun accésit na 5ª edición dos Premios SIGRAUTO á Innovación na Recuperación grazas ao proxecto “De residuo a recurso: reutilización de pneumáticos de vehículos como mobiliario corporativo”, unha iniciativa que aposta pola Economía Circular e a valorización de materiais procedentes de vehículos ao final da súa vida útil.
Os Premios SIGRAUTO teñen como obxectivo distinguir proxectos innovadores que contribúan á mellora da recuperación de compoñentes e materiais de vehículos fóra de uso, ao incremento da eficiencia dos procesos ou ao impulso do ecodeseño no sector da automoción.
A proposta presentada por Trameve transforma pneumáticos fóra de uso nun recurso útil mediante a fabricación de papeleiras de recollida selectiva para contornas corporativas. O proxecto combina sostibilidade, funcionalidade e deseño, dando unha segunda vida a un residuo de elevado impacto ambiental e contribuíndo á redución do consumo de materias primas.
Segundo os datos do proxecto, en España xéranse anualmente máis de 100.000 toneladas de pneumáticos fóra de uso. A reutilización deste material permite reducir o impacto ambiental asociado á súa xestión e evitar emisións de CO₂, ao tempo que promove novos usos baseados nos principios da Economía Circular. De feito, cada pneumático reutilizado pode evitar a emisión de ata 40 quilogramos de CO₂.
A iniciativa destaca tamén pola aplicación de criterios de ecodeseño, apostando por solucións duradeiras, funcionais, adaptables e de fácil mantemento. O proxecto foi validado como unha proposta viable e con potencial de crecemento e replicabilidade noutras contornas.
O accésit foi recollido por Luis Penido, xerente de Trameve, durante un acto celebrado o pasado 9 de xuño no recinto feiral de IFEMA, en Madrid. O recoñecemento pon en valor a capacidade de innovación dos Centros de Tratamento Autorizado de Vehículos Fóra de Uso (CAT) e o papel que desempeñan na procura de solucións que contribúan á protección do medio ambiente e ao aproveitamento eficiente dos recursos.
Este recoñecemento reforza a aposta de Trameve pola innovación e a sostibilidade, demostrando que é posible converter un residuo nun recurso útil e xerar valor ambiental a través da creatividade, a Economía Circular e o compromiso co desenvolvemento sostible.
