- Novas COGAMI Social
- 18 de agosto de 2025
A asociación AEPEF Galicia vive un bautismo de mar accesible no Náutico de Portonovo
A Asociación Española de Paraparese Espástica Familiar (AEPEF), a través da súa delegación en Galicia, participou nunha xornada de bautismo de mar accesible organizada polo Club Náutico de Portonovo, dentro do proxecto "A náutica ao alcance de todos". Esta iniciativa, promovida polo propio Club en colaboración coa Consellería do Mar, ten como obxectivo achegar o mundo da navegación a persoas con discapacidade e necesidades de apoio.
Durante a xornada, varias persoas con Paraparese Espástica Familiar (PEF) e familiares tiveron a oportunidade de embarcarse en veleiros lixeiros adaptados, gozando dunha actividade segura e accesible, acompañadas por persoal técnico especializado e voluntariado. A experiencia comezou cunha charla formativa sobre navegación, seguridade no mar e boas prácticas ambientais, seguida dunha travesía pola ría de Pontevedra.
A valoración por parte das persoas participantes foi moi positiva, destacando a importancia de fomentar o lecer activo, a inclusión social e o contacto co medio natural para mellorar o benestar emocional e a calidade de vida das persoas con enfermidades neurodexenerativas. A entidade tamén propuxo melloras nos sistemas de embarque co fin de reforzar a seguridade nas futuras edicións, coa vontade de consolidar esta xornada como unha cita anual de referencia no ámbito do ocio accesible.
