- Novas COGAMI Social
- 26 de agosto de 2024
A Deputación de Lugo asina un convenio de colaboración con COGAMI para o financiamento do centro de atención diúrna de Fingoi
A Deputación de Lugo reafirma o seu compromiso co benestar social e a inclusión ao asinar un convenio de colaboración con COGAMI. Este acordo, formalizado polos presidentes de ambas institucións, José Tomé Roca e Anxo Queiruga, prevé unha subvención directa nominativa de 35.000 euros, destinados a financiar os gastos do centro de atención diúrna que COGAMI xestiona no barrio lucense de Fingoi durante o ano 2024.
O apoio económico insírese no Plan Estratéxico de Subvencións da Deputación de Lugo, especificamente no apartado de Benestar Social da Área Funcional de Promoción Económica e Social. A través deste plan, búscase promover a autonomía persoal e o desenvolvemento das capacidades físicas, psicolóxicas e emocionais das persoas con discapacidade. Ademais, co financiamento outorgado, favorecerase a mellora da participación e inclusión das persoas usuarias na súa contorna mediante o reforzo da súa independencia funcional e cognitiva.
O centro de Fingoi ofrece programas orientados á mellora das habilidades cognitivas, comunicativas e físicas das persoas usuarias, co obxectivo de que poidan participar activamente na vida social e comunitaria. O convenio asinado terá vixencia ata o 31 de xaneiro de 2025, asegurando así unha continuidade na prestación destes servizos esenciais para o benestar das persoas con discapacidade en Lugo.