- Novas COGAMI Social
- 27 de agosto de 2025
COGAMI e o seu movemento asociativo poñen en marcha 39 proxectos sociais que beneficiarán a máis de 3.000 persoas con discapacidade en Galicia
A Confederación Galega de Persoas con Discapacidade (COGAMI) e as súas entidades membro están a desenvolver un total de 39 programas financiados a través dos fondos do 0,7% do IRPF, procedentes das persoas contribuíntes que marcaron o recadro 106 de Fins Sociais na declaración da renda, fondos que xestiona a Xunta de Galicia. Estas iniciativas están a beneficiar durante este ano a máis de 3.000 persoas con discapacidade e ás súas familias en toda Galicia, especialmente en contornos rurais.
Os proxectos organízanse en cinco liñas estratéxicas: apoio ás familias, inclusión sociolaboral, promoción da autonomía persoal, mellora de infraestruturas e igualdade de xénero.
No ámbito do apoio familiar, destaca o programa In-Itinere, desenvolvido no centro de atención diúrna de COGAMI en Fingoi (Lugo), dirixido a familias en situacións de especial vulnerabilidade derivadas da discapacidade.
En inclusión sociolaboral, COGAMI e ACADAR (Asociación de Mulleres con Discapacidade de Galicia) impulsan o Servizo de Inclusión e Transición ao Emprego, que ofrece orientación e acompañamento personalizado para facilitar a inserción laboral e a autonomía económica.
A promoción da autonomía persoal concrétase en programas de atención especializada, atención integral, asesoramento social, atención temperá, transporte adaptado, actividades de lecer, cultura e deporte inclusivo, así como servizos de rehabilitación e apoio terapéutico. Estes servizos desenvólvense tanto desde COGAMI como a través das súas entidades membro distribuídas por todo o territorio galego.
Neste eido, desenvólvense actividades de físico-rehabilitadoras, de atención psicolóxica e apoio social:
- AFFOU (Asociación de Fibromialxia e Fatiga Crónica de Ourense),
- AGFQ (Asociación Galega de Fibrose Quística),
- AGL (Asociación Galega de Linfedema)
- GRUMICO (Grupo de Persoas con Discapacidade de A Coruña)
Programa de atención integral que favorece a recuperación funcional potenciando a autonomía na vida diaria.
- ADAPTA (Asociación de Persoas con Discapacidade das Comarcas do Condado e Paradanta)
- AVEMPO (Asociación Viguesa de Esclerose Múltiple de Pontevedra)
- AMIZADE (Asociación de Persoas con Discapacidade da Comarca de Pontevedra.
Promoción da igualdade de oportunidades na vida social e no acceso ao emprego.
- ACEM Coruña
- ACEM Santiago
- ASOTRAME (Asociación Galega de Transplantados de Medula Ósea)
Apoio psicosocial e asesoramento individualizado.
- Entidades de Loita Contra as Enfermidades do Ril: Alcer Coruña, Alcer Ourense e Alcer Pontevedra.
- ACCU (Asociación de Enfermos de Crohn e Colite Ulcerosa).
Atención Temperá dirixido a nenos e nenas de 0 a 6 anos con trastornos de desenvolvemento ou discapacidade recoñecida.
- VONTADE (Asociación de Persoas con Discapacidade de Baixo Miño).
- MiISELA (Asociación de Persoas con Discapacidade da Comarca de Noia e Muros).
Lecer, Cultura e Deportes Inclusivos que promoven a participación activa en actividades culturais e deportivas
- ASEM GALICIA (Asociación Galega contra as Enfermidades Neuromusculares).
- ÁMBAR (Asociación das Persoas con Diversidade Funcional na comarca da Barbanza).
Orientación, asesoramento e terapias como fisioterapia, terapia ocupacional ou psicoloxía.
- ASEM Galicia (Asociación Galega contra as Enfermidades Neuromusculares).
- ASEARPO (Asociación de Enfermos de Artrite de Pontevedra)
- ConArtrite Santiago.
Transporte Adaptado, servizo que reforza a mobilidade mediante a contratación de condutores ou condutoras e a ampliación das rutas que garanten o acceso ás persoas usuarias dos centros de atención diúrna de COGAMI.
Na liña de mellora de infraestruturas, realizáronse actuacións incluíndo obras de accesibilidade, eficiencia enerxética, instalación de enerxías renovables e adquisición de equipamento para talleres, rehabilitación e servizos dixitais. Ademais de levárense a cabo nos centros de atención diúrna de COGAMI en Mos, Monte Porreiro (Pontevedra), Fingoi (Lugo), Medelo (Silleda) e no CEGADI, en Santiago,tamén se realizaron nas entidades:
- A Mariña COGAMI, mellorou as instalacións do centro de Palmeiro (Xove).
- ACADAR, o proxecto ACADAR 3.0 centrado na mellora dos recursos dixitais ofrece unha atención de calidade a mulleres e nenas con discapacidade.
- ACEM Santiago, engadiu salas multifuncionais para atención e actividades.
- ADAPTA de Ponteareas adquiriu un vehículo adaptado para o seu centro.
- AGORA de Monforte de Lemos dotou o seu centro de día de material para terapias e reformou un aseo.
- AIXIÑA de Ourense instalou enerxía solar fotovoltaica no seu centro integral de servizos.
- AMARAI de Arzúa e Terras de Melide mellorou o servizo de transporte adaptado.
- AMBAR da comarca da Barbanza fixo obras de conservación e mantemento da fachada do seu centro.
- AODEMPER adquiriu material informático.
- ASPAMITE de Teo dotouse de material de rehabilitación.
- ÍNTEGRO de Costa da Morte realizou obras de mellora no seu centro.
- Párkinson Galicia Coruña co proxecto DixiPark, centrado na atención integral a persoas con párkinson.
- VONTADE, con obras de reparación do seu centro.
No eido da igualdade de xénero, COGAMI e ACADAR levan a cabo o programa Activa-das, que busca apoderar ás mulleres con discapacidade mediante formación, acompañamento e creación de espazos seguros para fomentar a súa autonomía persoal e social.
Con este conxunto de accións, COGAMI e as súas entidades membro reafirman o seu compromiso coa inclusión, a equidade e os dereitos das persoas con discapacidade e familias galegas, apostando por un modelo máis participativo, accesible e centrado nas persoas.
