- Novas COGAMI Social
- 11 de agosto de 2025
COGAMI reforza o servizo do centro de Fingoi co apoio da Deputación de Lugo
COGAMI vén de renovar un convenio de colaboración coa Deputación de Lugo para o funcionamento do centro de atención diúrna que ten en Fingoi, un recurso esencial para a mellora da calidade de vida dunha trintena de persoas con discapacidade na cidade.
O presidente de COGAMI, Anxo Queiruga, asinou no Pazo de San Marcos un convenio co presidente da Deputación, José Tomé Roca, polo que o organismo provincial achegará 35.000 euros, o que supón o 70% do investimento necesario para o mantemento deste servizo.
Este apoio permitirá garantir programas de fisioterapia e terapia ocupacional dirixidos a potenciar a independencia funcional, as aptitudes cognitivas, comunicativas e físicas, favorecendo un desenvolvemento máis autónomo das persoas usuarias. Ademais, a achega tamén cubrirá gastos de persoal -un equipo de oito profesionais formado por pedagogo, educador social, monitor con coñecementos informáticos, logopeda e traballador social- así como de medios materiais, entre eles equipamento informático, conexión a internet, aulas equipadas e material de rehabilitación.
