- Novas
- 01 de julio de 2022
A asociación VONTADE e o Club Sen Amarras organizan rutas náuticas inclusivas polo río Miño
A Asociación de Persoas con Discapacidade da Comarca do Baixo Miño (VONTADE) está a desenvolver, en colaboración co Club Sen Amarras, xornadas inclusivas de navegación polo río Miño, nas que contribúe á difusión da contorna natural da comarca.
Estas xornadas, que se realizan co apoio da Deputación Provincial de Pontevedra no marco do proxecto “Río Miño Marca Inclusiva”, introducen o concepto do turismo accesible ofrecendo os recursos que garanten a igualdade de oportunidades de todas as persoas, poñendo en valor un recurso natural e medioambiental, como é o río Miño, ao grupo social das persoas con discapacidade que de forma habitual non pode acceder a este medio.
Nas mesmas tamén participa o Concello de Tomiño a través do proxecto “Navegando pola historia do Baixo Miño”, co obxectivo de dar a coñecer o patrimonio histórico da contorna achegándonos ao sistema de fortificacións e á historia da Guerra de Restauração que deron lugar ás mesmas.
A actividade está aberta á participación, polo que as entidades e/ou persoas con discapacidade interesadas poden contactar coa asociación VONTADE no teléfono 986 62 30 44 ou no correo electrónico santos@vontade.org.
Dende VONTADE recalcan a necesidade de facer accesible e promocionar a comarca entre as persoas con discapacidade, cumprindo cos obxectivos de accesibilidade universal.