As entidades integrantes do Comité de Entidades Representantes de Persoas con Discapacidadade Galicia (Cermi Galicia), sendo COGAMI unha destas, participaron nunha xornada de sensibilización da discapacidade ante deputadas e deputados do Grupo Popular no Parlamento de Galicia.
Este evento, que contou coa presenza da conselleira de Política Social, Fabiola García, serviu para achegar os logros e as problemáticas que se atopan no seu día a día tanto as entidades que representan á discapacidade como tamén as propias persoas que representan.
Dende o Cermi Galicia, plantexóuselle ao Grupo Popular do Parlamento de Galicia a necesidade de crear unha comisión permanente sobre discapacidade na Cámara Autonómica, ademais da creación dun espazo sociosanitario común, a actualización do censo de persoas con discapacidade e un desenvolvemento do concerto social.
O voceiro do PP na Cámara, Pedro Puy, recoñeceu o traballo que desenvolven as entidades por mellorar a situación diaria das persoas con discapacidade. Tamén destacou que esta xornada “permitiu afondar no coñecemento e necesidades das persoas con discapacidade, incrementando a sensibilización sobre os seus problemas”.