- Novas
- 16 de marzo de 2022
COGAMI inicia curso de alfabetización dixital no que se forman nove persoas con discapacidade de Lugo
As instalacións que COGAMI ten en Lugo (Rúa da luz, 4) acollen un curso de Alfabetización dixital no que se están a formar 9 persoas, 7 homes e 2 mulleres, con discapacidade ou incapacidade laboral para profesión habitual, procedentes dos concellos de Lugo e Guitiriz.
Esta formación, financiada polo Ministerio de Educación e Formación Profesional a través de COCEMFE e dentro das Actuacións dirixidas á atención de adultos con NEE 2021-22, contará cun total de 85 horas lectivas que serán impartidas de luns a venres en horario de 9:00 a 14.00 horas, e nos que abordarán os módulos de internet, procesador de textos e folla de cálculo.
Este curso está dentro do programa formativo que desenvolve COGAMI anualmente e que está adaptado ás necesidades do mercado e ás capacidades da persoa con discapacidade, para que adquira competencias que a capaciten no seu desenvolvemento profesional. “O obxectivo final da nosa formación é a inserción laboral, por iso temos moi en conta tanto as necesidades das persoa como tamén as demandas que presenta o tecido empresarial das zonas nas que actuamos”, explica Paco Abuín, coordinador da área de Formación de COGAMI.
Estes cursos que desenvolve COGAMI teñen como obxectivo impulsar a inserción sociolaboral, co fin de que o alumnado acade os coñecementos e habilidades para poder inserirse canto antes no mercado laboral. Arestora, bolsa de emprego de COGAMI ten inscritas un total de 1.551 persoas inscritas na oficina que COGAMI ten en Lugo.