• Novas
  • 08 de abril de 2019

COGAMI inicia curso de persoal de limpeza en Santiago

COGAMI inicia curso de persoal de limpeza en Santiago


As instalacións que COGAMI ten en Fontiñas acollen un curso de Persoal de Limpeza no que se están a formar un total de 12 persoas con discapacidade, das que 5 son mulleres e 7 son homes, procedentes dos concellos de Santiago (8), Ames (1) e Noia (3).

Esta formación, que financia a Consellería de Política Social e o Fondo Social Europeo consta de 200 horas lectivas que se impartirán ata o día 7 de xuño, en horario de 9 a 14 horas, estando divididas nos seguintes módulos: limpeza de cristais, limpeza, tratamento e mantemento de mobiliario interior e solos, técnicas e procedementos de limpeza con utilización de maquinaria, ademais de realizar prácticas profesionais non laborais.

A través deste curso preténdese que o alumnado aprenda a realizar tarefas de limpeza e mantemento de superficies e mobiliario seleccionando as técnicas, útiles, produtos e máquinas para garantir a hixienización, conservación e mantemento, baixo a supervisión dun/ha profesional competente, cumprindo coa normativa aplicable en materia de seguridade e saúde.

O alumnado, que conta con idades comprendidas entre os 25 e os 59 anos, ten certificado de discapacidade ou incapacidade laboral recoñecida para profesión habitual, certificados necesarios para poder matricularse nesta formación.

COGAMI ten como obxectivo promover a inclusión social e loitar contra a pobreza e calquera forma de discriminación. Neste senso, a Confederación proporciónalle ao alumnado as destrezas profesionais que lle permitan un rendemento competitivo no mercado de traballo, co fin de acadar a plena participación social e laboral. Todas as persoas que iniciaron este curso estaban apuntadas no servizo de emprego que ten COGAMI.