- Novas
- 03 de marzo de 2023
COGAMI inicia en Ferrol un curso de persoal polivalente de servizos 2.0 con dez persoas con discapacidade
COGAMI inicia nas instalacións que ten en Ferrol (rúa Sánchez Calviño, nº 56-58) un curso de Persoal polivalente no que se están a formar 10 persoas con discapacidade procedentes dos concellos de Fene, Ferrol, Narón, Neda e Cedeira.
Esta formación está enmarcada no programa ‘Un a un’, financiado por Fundación ONCE e o Fondo Social Europeo dentro da convocatoria de axudas económicas a proxectos de reforzo da empregabilidade de persoas con discapacidade no marco do programa operativo de inclusión social e economía social POISES 2022-2023.
A través de formacións como esta que se está a levar a cabo en Ferrol, preténdese dar resposta a unha demanda real de profesionais polivalentes, ao mesmo tempo que se mellora a oportunidade de empregabilidade destas dez persoas, todas elas apuntadas no Servizo de Orientación e Intermediación Laboral de COGAMI como demandantes de emprego.
O curso, que ten unha duración de 265 horas, das que 100 horas serán impartidas como prácticas en postos de traballo en empresas da comarca, englobará módulos sobre temáticas como comunicación e atención ao cliente, informática e xestións administrativas básicas, limpeza, tratamento e mantemento de mobiliario interior e solos, prevención de riscos laborais, primeiros auxilios e protección contra incendios.
Todas as persoas que iniciaron esta formación, ademais de coincidir en que teñen o certificado de discapacidade de como mínimo do 33% ou certificado de incapacidade laboral da Seguridade Social, comprenden entre os 40 e os 62 anos, e teñen experiencia laboral en sectores nos que traballaron anteriormente como hostalería, limpeza, comercio, electricidade, servizos de reparto, entre outros.
Formacións como esta que imparte COGAMI en Ferrol contribúen á preparación e cualificación de persoas con discapacidade desempregadas da comarca, pretendendo mellorar as súas posibilidades no mercado laboral, como así amosan os datos do ano pasado que reflicten que 45,6% das persoas que se formaron con COGAMI, lograron atopar traballo.