• Novas
  • 24 de abril de 2019

COGAMI inicia en Pontevedra un curso de auxiliar de panadería

COGAMI inicia en Pontevedra un curso de auxiliar de panadería


COGAMI inicia en Pontevedra un curso de Auxiliar de panadería dirixido a persoas que teñen certificado de discapacidade ou incapacidade laboral recoñecida para profesión habitual.

Esta acción formativa, con duración de 100 horas lectivas, 60 teóricas e 40 prácticas, impártese durante as mañás de luns a venres en horario de 9 a 14 horas ata o 21 de maio, estando dividida nos seguintes módulos: atención ao cliente, manipulador de alimentos e alérxenos, vendedor en establecementos comerciais, operacións básicas de cafetería, panadería e pastelería, servizos de bar e cafetería e servizos de panadería, bolería e pastelería.

En total son 14 persoas con discapacidade as que iniciaron este curso, 11 mulleres e 3 homes, procedentes dos concellos de Pontevedra, Poio Marín, Bueu e Cerdedo. Os perfís das persoas que iniciaron esta formación poden diferenciarse nun grupo que comprende idades de entre 25 e 35 anos, co que o buscan é poder atopar o seu primeiro emprego tralo remate da formación, e outro grupo de integrantes do curso comprende entre 45 e 60 anos, co que o que buscan a través deste programa é a reciclaxe profesional.

Esta acción formativa forma parte do programa de inserción laboral Máis Emprego que financia Fundación Bancaria “la Caixa” e o Fondo Social Europeo, programa que se desenvolve nas comarcas de O Salnés, Pontevedra e Vigo, co fin de dotar de competencias necesarias ás persoas con discapacidade de cara á inserción laboral.

Máis Emprego proporciónalle ao alumnado destrezas profesionais que lle permiten un rendemento competitivo no mercado laboral ademais de desenvolver habilidades persoais para a súa participación social.

Dende que iniciou este programa en 2017, lévanse impartido 14 cursos nos que se formaron un total de 139 persoas con discapacidade (63 mulleres e 76 homes). De todas estas persoas formadas, 100 delas conseguiron inserirse laboralmente tras pasar por Máis Emprego, das que 52 son mulleres e 48 son homes, co que conta, ata o de agora, cunha porcentaxe de inserción do 72%.