- Novas
- 18 de julio de 2022
COGAMI remata curso de almacén e carretilla impartido en Vigo con catro insercións laborais
Acto de entrega de diplomas ás 14 persoas procedentes de concellos do sur da provincia de Pontevedra que se formaron no curso de Almacén e carretilla impartido por COGAMI nas instalacións que ten en Vigo.
Esta formación está enmarcada dentro das accións que contemplan o programa de inserción laboral Máis Emprego que cofinancian Fundación “la Caixa” e o Fondo Social Europeo (FSE).
Iniciou o 2 de maio, contemplando unha duración de 120 horas, 70 destas prácticas realizadas en colaboración con diversas empresas como Bricoking, Tiger, Povisa, Partenon e Alcampo. Precisamente, as catro persoas inseridas laboralmente foron contratadas polas empresas nas que realizaron as súas prácticas.
Un dos requisitos para poder formar parte deste curso era que o alumnado tiña que ter o certificado de discapacidade ou incapacidade laboral para a profesión habitual. A través deste curso preténdese mellorar as súas posibilidades de reincorporación ao mercado laboral mediante a obtención dun diploma acreditativo dos coñecementos que son necesarios para o manexo da carretilla elevadora e para a xestión básica dun almacén.
O alumnado, procedente dos concellos de Vigo, Gondomar, Tomiño, Salvaterra e A Guarda, ten idades comprendidas entre os 35 e os 57 anos. Ao remate desta formación, tiveron a oportunidade de participar nun obradoiro de mellora das habilidades tecnolóxicas e busca de emprego, acción que tamén está enmarcada dentro do programa Máis Emprego.
No que vai de ano, o programa Máis Emprego impartiu catro cursos formativos: dous de Limpeza hospitalaria desenvolvidos nas comarcas de O Salnés e Pontevedra que contan cunha do 75% das persoas formadas e outro de Conserxería impartido en Marín, acadando unha inserción do 42%. No primeiro semestre do ano, foron 68 persoas atendidas dentro do programa, das que 26 están actualmente traballando.