• Novas
  • 22 de mayo de 2017

COGAMI reúnese co Conselleiro de Economía para amosarlle os bos resultados da Organización acadados no exercicio anterior

COGAMI reúnese co Conselleiro de Economía para amosarlle os bos resultados da Organización acadados no exercicio anterior

O conselleiro de Economía, Emprego e Industria, Francisco Conde, mantivo unha xuntanza en Santiago co presidente de COGAMI, Anxo Queiruga, na que abordaron as ferramentas coas que conta a Xunta para apoiar o emprego inclusivo.

Conde puxo en valor o labor e esforzo que leva a cabo COGAMI para que Galicia siga avanzando cara á inclusión das persoas con discapacidade, como o constata a xestión de 11 iniciativas empresariais de economía social que empregan a máis de 800 persoas, e que a Consellería apoiou cun financiamento que superou os 4 millóns de euros.

Dende a Consellería, volveron reiterar o seu apoio para este ano aos centros especiais de emprego, aumentando o orzamento nun 18% con respecto ao ano pasado, chegando a 12,2 millóns de euros a contía, para impulsar a posta en marcha e mantemento de instalacións, ademais de colaborar nos custes salariais do persoal laboral.

Francisco Conde comentoulle a Anxo Queiruga que para este ano dende a súa consellería queren primar a creación de postos de traballo para os colectivos con máis dificultades para acceder ao emprego, como son as persoas con discapacidade.

O Goberno galego conta tamén con axudas específicas para incentivar a contratación por conta allea dos colectivos con maiores dificultades de inserción como son os apoios para a integración laboral na empresa e o de emprego con incentivos por cada contratación.

Con respecto aos apoios da Administración autonómica para impulsar a inserción laboral das persoas en risco de exclusión social, o conselleiro informou a COGAMI de que a Xunta vén de aprobar un programa especifico para este colectivo dotado con 7,6 millóns de euros para beneficiar a 900 persoas e que inclúe tres liñas de axudas.