- Novas
- 29 de marzo de 2021
COGAMI traballa co Concello de Santiago na mellora da accesibilidade de 29 puntos da cidade
Un total de 29 zonas de Santiago de Compostela, que arestora non cumpren coa Lei de Accesibilidade, serán intervidas a partir do mes de xuño, segundo comunicou o concelleiro de Barrios e Obras do concello de Santiago, Javier Fernández, durante unha xuntanza mantida co presidente de COGAMI, Anxo Queiruga, na que tamén estivo presente o coordinador da área de Accesibilidade de COGAMI, Álvaro García.
Estes puntos que se van mellorar foron seleccionados tralas preto de 300 incidencias recibidas no servizo de Proxectos e Obras do Concello de Santiago procedentes dun estudo elaborado por COGAMI no que analizou todo o percorrido dende a Avenida de Lugo ata Vista Alegre, e a través doutras entidades da cidade como AMICO e ACEM Santiago, ademais das derivadas pola Liña Verde do Concello.
Cun orzamento dispoñible de 230.384 euros, as primeiras intervencións que se levarán a cabo foron seleccionadas tendo en conta conceptos como a seguridade, localización e importancia urbana, o grao de accesibilidade actual, a demanda cidadá e valoracións técnicas.
As 29 incidencias en accesibilidade están repartidas por toda a cidade, dende Avenida Xoán XXIII ata Rúa do Banquete de Conxo, Rúa Irmandiños xunto ao IES Arcebispo Xelmírez, Romero Donallo, García Lorca, Fontes do Sar, Avenida da Liberdade e as rúas do Hórreo, República Arxentina e Praza de Galicia. As obras que arestora se están acometendo na Rúa Concheiros foron xa revisadas pola área de Accesibilidade de COGAMI.
Dende COGAMI, Anxo Queiruga agradece a “boa disposición do Concello de Santiago, co que xa hai tempo que traballamos conxuntamente na mellora da accesibilidade e seguiremos traballando nesta liña”. Pola súa parte, o Concelleiro reiteraba a súa disposición a que Santiago sexa unha cidade máis inclusiva e engade que “no pleno do concello volvín incidir que este ano poñan enriba da mesa máis de 300.000€ para accesibilidade que non vexo que sexa incompatible con actuacións na seguridade viaria”.
Dende o Concello, Javier Fernández comprometeuse a que todas as obras que se vaian realizar en Santiago vano facer cumprindo coa norma en accesibilidade e para iso contará coa supervisión das entidades do sector da discapacidade.