- Novas
- 27 de mayo de 2021
Máis de 50 persoas con esclerose múltiple de Compostela beneficiarias do servizo de psicoloxía da entidade ACEM
A Asociación Compostelá de Esclerose Múltiple, ACEM, renova o seu servizo de Intervención psicolóxica en esclerose múltiple, un servizo especializado moi demandado polas persoas afectadas pola enfermidade e as súas familias.
Este servizo está enmarcado no programa Atención social e asesoramento especializado e está cofinanciado pola Xunta de Galicia a través da convocatoria de concesión de subvencións destinadas á realización de programas de interese xeral para fins de carácter social, con cargo á asignación tributaria do 0,7% do IRPF.
As actuacións desta intervención psicolóxica especializada van encamiñadas a: identificar e intervir nos distintos trastornos, proporcionando habilidades para o afrontamento do estrés diario e control da ansiedade; detectar e procurar o cambio de pensamentos, crenzas erróneas e disfuncionais en torno á enfermidade e as súas implicacións; alentar a expresión de sentimentos, ofrecer apoio, soporte verbal e información; mellorar a autoestima e motivar no establecemento e consecución de novas metas.
A esclerose múltiple é unha das enfermidades máis comúns do sistema nervioso central, afectando en Galicia a máis de 4.000 persoas, unha das taxas máis altas dentro de España, que contempla a máis de 47.000 persoas.
É unha enfermidade crónica autoinmune, desmielinizante, neurodexenerativa e progresiva do Sistema Nervioso Central. Os síntomas tempranos máis habituais son a fatiga, problemas de visión, formigueos, entumecementos, vértigos e mareos, debilidade muscular, espasmos e problemas de equilibrio e coordinación. Moitas manifestacións da enfermidade son ‘invisibles’, pero inciden no día a día destas persoas. A incapacidade que provoca caracterízase por trastornos motores, cognitivos e da agudeza visual, acompañada doutras alteracións como ansiedade e depresión.
As persoas socias de ACEM interesadas neste servizo poden contactar coa asociación nos teléfonos 98 575 240 – 620 533 471 e no mail acem.santiago@gmail.com