- Novas
- 14 de octubre de 2022
Máis de sesenta mulleres participan nun programa de promoción da igualdade que desenvolve COGAMI
COGAMI está a desenvolver un programa de Promoción da Igualdade entre Mulleres e Homes no que están a participar máis de sesenta mulleres ao longo de todo este ano. A todas elas se lles proporciona o apoio necesario para desenvolver o seu plan vital, promovendo o desenvolvemento máximo das capacidades para mellorar a autonomía persoal co trazado de itinerarios personalizados de intervención social.
Moitas das participantes deste programa son mulleres con discapacidade en situación de especial vulnerabilidade e de emerxencia social, con multiplicidade de factores de exclusión social, en situación de desemprego ou con maiores dificultades de inserción ou participación social derivadas de circunstancias persoas e/ou familiares.
Financiado pola Xunta de Galicia a través dos fondos do 0,7% do IRPF daquelas persoas contribuíntes que marcaron o recadro de Actividades de Interese Social, coñecido como X Solidaria, este programa está dirixido a promover a igualdade entre mulleres e homes, potenciar a participación e a presenza de mulleres na vida política, económica, cultural e social, así como a atender a todas aquelas mulleres con discapacidade que se atopan en situación de vulnerabilidade.
Para lograr o empoderamento e participación activa das mulleres, o programa ofrece información e asesoramento, en especial a aquelas que viven situacións de vulnerabilidade ou que residen no medio rural. Para isto utilízase unha metodoloxía centrada na persoa, iniciando coa análise de necesidades e realizando as intervencións cun enfoque comunitario incidindo no propio entorno natural das persoas.
O Programa de Promoción da Igualdade entre mulleres e homes conta cun equipo formado por seis traballadoras sociais localizadas nas instalacións que COGAMI ten en A Coruña, Ferrol, Santiago, Vigo e Lugo.