• Novas
  • 24 de noviembre de 2017

MANIFESTO COGAMI: 25 de novembro Día Internacional de eliminación de violencia contra as mulleres

MANIFESTO COGAMI: 25 de novembro Día Internacional de eliminación de violencia contra as mulleres


Neste día, a Confederación Galega de Persoas con Discapacidade (COGAMI) e o seu movemento asociativo, debemos e queremos ter un emotivo recordo polas 44 mulleres, así como para os 6 menores que foron asasinados, e os 23 menores orfos como consecuencia da violencia machista, segundo datos oficiais do Ministerio de Sanidade e Servizos Sociais.

E ademais, queremos poñer o énfase sobre a situación de violencia que seguen a vivir as mulleres e nenas con discapacidade, a pesar da preocupación manifestada pola Asemblea Xeral das Nacións Unidas, que recoñecía … “o feito de que algúns grupos de mulleres, como as que pertencen a minorías, as mulleres indíxenas, as refuxiadas, as mulleres migrantes, as mulleres que viven en comunidades rurais ou remotas, as mulleres indixentes, as mulleres recluídas en institucións ou detidas, as nenas, as mulleres con discapacidade, as mulleres de idade e as mulleres en situacións de conflito armado, son particularmente vulnerables á violencia”.

A falta de acceso das mulleres con discapacidade aos servizos especializados en violencia de xénero, dende os recursos sanitarios, sociais, policiais y xudiciais, segue constituíndo a maior discriminación que atopamos á hora de poder manifestar e denunciar a situación na que nos atopamos. Así se contemplou a falta de accesibilidade como un punto importante a traballar na Lei Orgánica 1/2004, de 28 de decembro, de Medidas de Protección Integral contra a Violencia de Xénero. Xa pasaron 13 anos dende a súa promulgación sen facer nada concreto neste senso.

Ademais, na Lei Xeral dos Dereitos das Persoas con Discapacidade e a súa inclusión social aprobada polo Real Decreto Lexislativo 1/2013, contemplouse que debían eliminarse todo tipo de barreiras dos edificios e servizos públicos, xa que o seu uso e desfrute son considerados como un dereito das persoas con discapacidade, para elo deuse un prazo que finaliza este 4 de decembro de 2017. Lamentablemente, dende COGAMI, queremos denunciar que seguimos sen ter os servizos especializados de violencia de xénero accesibles.

Por todo elo, ESIXIMOS:

  • Que, dende a Delegación de Violencia de Xénero do Ministerio, se poña en marcha unha campaña informativa sobre accesibilidade para as Forzas e Corpos de Seguridade do Estado, así como a avogacía e o Consello Xeral do Poder Xudicial.
  • Que se dote orzamentariamente ao Ministerio do Interior para garantir a accesibilidade aos recursos especializados das Forzas e Corpos de Seguridade do Estado.
  • Que se doten suficientemente as partidas orzamentarias, especialmente nas Comunidades Autónomas e recursos de proximidade para mellorar a atención ás mulleres que viven/viviron situacións de violencia, prestando especial atención á accesibilidade dos recursos sanitarios e sociais especializados de violencia de xénero.
  • Realizar unha análise sobre a accesibilidade dos recursos existentes para mulleres en situación de violencia de violencia que permitan coñecer o grao de adecuación dos mesmos.
  • Promover subvencións para a eliminación de barreiras nos recursos especializados de violencia, tanto a nivel local, como autonómico como estatal, para acadar un acceso en igualdade de condicións e conforme aos dereitos das mulleres con discapacidade.
  • Garantir protocolos de actuación e detección de violencia ás mulleres con discapacidade dirixidos a profesionais.
  • Promover grupos de traballo dirixidos ás mulleres con discapacidade encamiñados a recoñecer as diferentes formas de violencia e os recursos existentes para erradicala.

Non máis violencia machista. Nin unha menos!!!!!!