- Novas
- 07 de noviembre de 2022
O centro de recursos de COGAMI en Mos incorpora melloras nos servizos que presta de transporte adaptado e autonomía persoal a través da X Solidaria
O centro de recursos que COGAMI ten en Mos incorporou persoal ao servizo de transporte adaptado que presta para o traslado de persoas usuarias dos concellos de Nigrán, Vigo, Mos, Porriño, Ponteareas e Redondela.
Esta incorporación financiouse a través da subvención destinada a programas de interese xeral para fins sociais que xestiona a Xunta a través dos fondos do 0,7% do IRPF procedentes de todas as persoas que marcaron na declaración da renda o recadro 106 de Actividades de interese xeral consideradas de interese social, máis coñecida por X Solidaria.
A maiores, o servizo de transporte adaptado permite o traslado das persoas ás actividades semanais de piscina no concello de Ponteareas, á actividade de ciclismo adaptado con Discamino en Vigo ademais doutras actividades de lecer, de non ser por este servizo, sería imposible poder participar pola dificultade do traslado das persoas con mobilidade reducida.
Outro dos servizos que presta o centro de COGAMI en Mos, co fin de mellorar a calidade de vida, autonomía persoal e inclusión social e laboral das persoas con discapacidade, é o programa de Atención Social e Asesoramento, para o que se contratou unha psicóloga para atender ás persoas que asisten ao centro de día.
Por último, durante este ano a través do 0,7% do IRPF financiouse material para utilizar no servizo de rehabilitación, dentro do apartado de proxectos de investimento e adecuación de centros e unidades de atención destinados a persoas maiores ou con discapacidade.