• Novas
  • 11 de octubre de 2017

Persoas con discapacidade de Ourense buscan ofertas de emprego a través da aula BAE que apoia a Fundación Vodafone

Persoas con discapacidade de Ourense buscan ofertas de emprego a través da aula BAE que apoia a Fundación Vodafone

María Berta Doforno Seoane foi unha das trinta persoas que quixeron aproveitar as vantaxes que lles proporciona a apertura dunha aula BAE, unha aula informática que abre todas as tardes dos mércores nas instalacións que COGAMI ten en Ourense.

A finalidade desta aula é a de servir como un recurso máis ás persoas que forman parte do programa denominado `PARTICIPA coa dis-CAPACIDADE´, programa que apoia Fundación Vodafone, e que serve para que as persoas potencien o uso das novas tecnoloxías durante a procura de emprego.

A aula, ademais de estar dotada co equipo informático, conta co apoio da orientadora laboral Lucía Chaves, para proporcionar toda a información adicional ou pautas que deben seguir as persoas usuarias á hora de realizar a procura de emprego pola rede.  

O traballo da orientadora é, como o seu propio nome indica, o de orientar, asesorar, guiar ou apoiar nas xestións que lle reclamen as persoas que acoden á aula. No que vai de ano xa foron 30 as persoas de Ourense que utilizaron este recurso, onde algunhas atoparon emprego e están a traballar e outras o tentan acudindo a entrevistas laborais.

María Berta xa logrou que a chamasen para varias entrevistas de traballo. Aos seus 58 anos sabe que o ten algo máis complicado para atopar unha oferta que se adapte ás súas capacidades, pero non tira a toalla. Mesmo se deu de alta nalgunha aplicación do seu teléfono móbil, para facilitar a procura dalgunha oferta interesante.

María Berta é unha das 19 persoas de Ourense que forman parte do programa `PARTICIPA COA dis-CAPACIDADE´ que, ademais de capacitar ás persoas que forman parte do mesmo na procura de emprego usando as novas tecnoloxías, tamén as forma a través de seminarios e a realización de círculos de emprego.

En toda a Comunidade Galega, a través deste programa realizáronse durante o mes de setembro un total de 175 orientacións laborais e seguimentos a persoas con discapacidade. Tamén se visitaron 31 empresas. Tras estas visitas e seguimentos realizados a outras 60 empresas, xestionáronse 45 ofertas de emprego que derivaron en 5 persoas contratadas. Ademais, co fin de seguir capacitando ás persoas que buscan emprego, en Santiago COGAMI impartiu un taller de competencias profesionais e en Ourense iniciouse o programa Poténciache.