- Novas
- 22 de septiembre de 2021
Persoas usuarias do centro de COGAMI en Medelo pasan uns días de vacacións na localidade almeriense de Mojácar
Un total de 9 persoas usuarias do centro de recursos que COGAMI ten en Medelo, Silleda, acompañadas de 2 profesionais, están arestora gozando da praia e do sol na localidade de Mojácar, en Almería. Ata alí viaxaron esta fin de semana dende o aeroporto de A Lavacolla, para pasar unha semana de vacacións que contempla visitas a outras localidades como Garrucha e a cidade de Almería e tamén desprazaranse polas distintas praias accesibles coas que conta este litoral.
Esta semana de vacacións está organizada por COCEMFE (Confederación Española de Personas con Discapacidad Física y Orgánica), entidade da que forma parte COGAMI, e que, tras un parón o ano pasado por mor da pandemia, volveu retomar este programa de vacacións que conta con éxito de participación a nivel de entidades de toda España.
Durante este ano ofertáronse máis de 30 viaxes que iniciaron no mes de xuño e que rematan neste mes de setembro, todas elas dirixidas a 450 persoas maiores de 16 anos, con discapacidade física ou orgánica igual ou superior a 33%, tendo prioridade as que superan o 50%, e podendo asistir tamén acompañantes.
Financiado polo IMSERSO e Fundación ONCE, este programa promove que as persoas con discapacidade poidan exercer o dereito ao descanso e ao tempo de lecer, dereitos recoñecidos por Nacións Unidas en 1948 e amparado pola Convención Internacional sobre os Dereitos das Persoas con Discapacidade.
O día 24 de setembro estará de volta o grupo para continuar coa súa actividade no centro de Medelo.