- Novas
- 21 de diciembre de 2022
Trinta mulleres do rural da provincia de Pontevedra participan nun programa de empoderamento de COGAMI
Baixo o nome de Activando o rural, o empoderamento das mulleres con discapacidade, a área de Promoción da Autonomía Persoal de COGAMI desenvolveu un proxecto co fin de empoderar a un total de trinta mulleres con discapacidade que viven na zona rural da provincia de Pontevedra.
Financiado pola Deputación de Pontevedra, as mulleres participantes recibiron dende orientación e información sobre recursos singularizados, de atención, orientación e asesoramento persoal e social, ata a resolución de consultas especializadas no eido da discapacidade, intervencións básicas do traballo social, información de todos os recursos e servizos dispoñibles para as mulleres con discapacidade na súa contorna.
Procedentes dos concellos de A Cañiza, Mondariz, Crecente, Ponteareas, Salceda de Caselas e Salvaterra de Miño, todas as participantes precisaban apoio social para desenvolver o seu plan vital. Para formar parte do programa, ademais de ser muller, ter discapacidade e vivir no rural, priorizouse naquelas que vivían en especial vulnerabilidade, en situación de desemprego ou con maiores dificultades de inserción derivadas de circunstancias persoais e/ou familiares.