- Novas
- 26 de octubre de 2022
Xuntanza de COGAMI co Presidente da Xunta para presentarlle as necesidades das persoas con discapacidade
O presidente de COGAMI, Anxo Queiruga, acompañado do vicepresidente, Ramón Sestayo, e do secretario xeral, Víctor Silva, asistiron a unha xuntanza co presidente da Xunta, Alfonso Rueda, para achegarlle as necesidades que ten o grupo social das persoas con discapacidade.
No encontro, Alfonso Rueda trasladoulle a COGAMI a inquedanza do Goberno galego polo benestar das súas persoas usuarias, segundo dixo “porque se estamos a vivir tempos difíciles para todos, máis aínda para as persoas que teñen algún tipo de limitación física”. Por iso, garantiu o apoio da Xunta nos proxectos que ten en marcha COGAMI no seu obxectivo de lograr a plena inclusión das persoas con discapacidade en todos os ámbitos da sociedade.
Esta foi a primeira xuntanza mantida co Presidente da Xunta dende que tomou posesión do cargo e na que lle informaron dos logros e tamén dos proxectos que está encamiñando a Confederación.