- Movemento Asociativo
- 14 de abril de 2026
A asociación AGL e a UDC colaboran para visibilizar o linfedema e o lipedema no campus de Ferrol
A Asociación Galega de Linfedema, Lipedema, Insuficiencia Venosa Crónica e Outras Patoloxías Vasculares Periféricas (AGL), en colaboración coa UDC Saudable da Universidade de A Coruña, celebra o próximo 14 de abril dúas actividades para dar visibilidade ao linfedema e ao lipedema, enfermidades crónicas e incapacitantes que afectan a milleiros de persoas en Galicia e que aínda hoxe carecen do recoñecemento e atención que merecen.
As actividades programadas para esta data son a exposición: "O linfedema e o lipedema na Muller en Imaxes", que se inaugura o martes, 14 de abril,, ás 16 horas, na entrada da Facultade de Enfermaría e Podoloxía do Campus de Ferrol.
A segunda actividade para este día é a charla: "Linfedema e lipedema nas mulleres", tamén o 14 de abril, ás 16:30 horas na Aula 1.1 Florence Nightingale, Facultade de Enfermaría e Podoloxía do Campus de Ferrol. A charla contará coas persoas poñentes María Araujo Rey, Traballadora Social de AGL, e Javier Agenjo, Fisioterapeuta.
Que son o linfedema e o lipedema?
Son enfermidades crónicas e incapacitantes que, de non ser diagnosticadas a tempo e tratadas de forma correcta, poden empeorar producindo un agravamento físico considerable, pero tamén emocional, dada a deformidade que poden provocar a nivel morfolóxico.
O linfedema calcula que afecta a 1 de cada 30 persoas. Prodúcese por un mal funcionamento do sistema linfático, que provoca unha acumulación de líquido e outras substancias nos tecidos brandos, xeralmente nas extremidades, aínda que pode afectar calquera parte do corpo. As consecuencias inclúen un aumento progresivo da extremidade afectada, diminución da capacidade funcional e inmunolóxica, aumento de peso e modificacións morfolóxicas.
O lipedema afecta a entre o 18 % e o 20 % das mulleres. É unha afección médica crónica caracterizada por unha acumulación simétrica de graxa nas pernas e, ás veces, nos brazos, deixando intactas mans e pes. As persoas afectadas presentan siluetas descompensadas nas que as extremidades inferiores son máis grosas que o resto do corpo. Non se trata de obesidade nin de celulite, aínda que é frecuente confundilo, xa que non responde ás dietas convencionais nin ao exercicio.
Necesidades urxentes destas patoloxías
A día de hoxe, as persoas que teñen estas patoloxías enfróntanse a importantes retos que deben ser atendidos polas administracións públicas e pola comunidade médica:
- Falta de diagnóstico precoz para obter un tratamento rápido e axeitado.
- Necesidade dunha maior inversión en investigación.
- Reforzar a formación de profesionais para evitar o empeoramento da saúde das pacientes, tanto a nivel físico e emocional como no seu día a día persoal, laboral e social.
- Información e formación axeitadas para a poboación xeral, co fin de evitar prexuízos e etiquetas inxustas.
- Equidade territorial: o código postal non debe determinar a calidade do tratamento recibido na sanidade pública.
- Recoñecemento da discapacidade para as persoas con estas doenzas.
AGL e UDC Saudable: xuntas pola visibilidade
A AGL traballa día a día para ofrecer asesoramento e levar a cabo accións de visibilidade, formación e información que contribúan a combater estas necesidades. Como parte da UDC Saudable, dentro da Universidade de A Coruña, e grazas á área de Muller e Saúde, a asociación organiza este ano dúas actividades complementarias: