- Xeral
- 07 de febrero de 2022
“Hai empresas que apostan por xente como nós”. José Antonio Agra, emigrante retornado con 55 anos.
José Antonio Agra, coa crise de 2011, foi despedido da empresa na que estaba traballando e non tivo máis remedio que ter que facer as maletas e marchar fóra do país para buscar unha oportunidade laboral que aquí vía case imposible.
E foise para Brasil, cunha maleta chea de experiencias, coñecementos e con moitas gañas de volver ao mercado laboral. Conseguiuno nunha empresa de distribución de bebidas que o contratou como xerente. Refixo a súa vida alá, estaba contento pero, un problema de saúde tróuxoo de volta para Galicia en 2018. Foi operado das dúas cadeiras, tivo que poñer próteses e con elas dedicarse a coidarse por un período de tres anos, aproximadamente.
José Antonio chega a COGAMI, como el mesmo define “desmotivado” porque para el, ter discapacidade e con 55 anos, cría que sería imposible atopar un emprego. Tiña unha titulación de licenciatura en dereito, ampla experiencia laboral e coñecementos para aportar na empresa pero, para el pesaban máis os pesimistas. “Pensaba que non ía ser fácil”, explica, “estaba con moita preocupación”.
Dende o Servizo de Orientación e Intermediación Laboral de COGAMI, traballouse con José Antonio animándoo a que se presentara a ofertas de emprego ás que tiña oportunidade de inserción. Así foi. Traballa nunha inmobiliaria de Santiago na que se encarga un pouco de todo, dende a xestión diaria de alugueres ata a venda, asesoramento no sector inmobiliario.
“Estou contento e agradecido coa empresa por apostar por min, unha persoa con discapacidade e coa miña idade”, expresa José Antonio, quen engade que “non é habitual que confíen en nós porque hoxe en día con 55 anos es un vello, entrar no mercado laboral é complicadísimo”.
Complicado ou non, o caso é que José Antonio traballa na inmobiliaria Óptima e como el mesmo remata a conversa expresa que “hai empresas que si apostan por xente como nós e esta é unha delas”.